Чашмае, ки сад дардро давост

Хоруғ , 23 июл. (АМИТ «Ховар», Л.Додоев).- Чашмаи Ямчуни ноҳияи Ишкошим дар масофаи 180 км аз шаҳри Хоруғ ва 83 км аз маркази ноҳия дар баландии 3300 метр аз сатҳи баҳр воқеъ аст. Дар асоси натоиҷи тадқиқоти мутахассисон оби чашмаи Бибифотимаи Заҳро аз нишонаҳои зиёди табобатӣ бархӯрдор аст. Аз ин хотир хосияти шифобахшии ин об ғайр аз муолиҷаи бемориҳои занона боз барои табобати узвҳои ҳозима, захми меъда ва рӯдаи дувоздаҳангушта, ҳамчунин барои касалиҳои ҷигар ва ғайра низ тавсия дода мешавад.Дар қаламрави ВМКБ беш аз 70 адад чашмаҳои мухталифи маъданӣ ва обҳои гарм мавҷуданд, ки теъдоди зиёдашон дар баландии беш аз 1500 то наздик ба чаҳор ҳазор метр аз сатҳи баҳр воқеъанд.