Ҷавонон ба шукуфоии кишвар талош мекунанд

Душанбе, 23 сентябр. (АМИТ «Ховар», Фарҳоди Шомаҳмад). — Дар шаҳри Душанбе  ҷаласаи ҷамъбастии Кумитаи ибтидоии Ҳизби Халқии Демократии Тоҷикистон дар ҶСК «Фурудгоҳи байналмилалии Душанбе» ва Ширкати ҳавопаймоии «Сомон Эйр» баргузор гардид. Дар ин ҷаласа масъалаҳои вобаста ба татбиқи сиёсати пешгирифтаи роҳбарияти мамлакат ва дигар масъалаҳои мавриди таваҷҷӯҳ муҳокима ва баррасӣ шуданд. Қайд карда шуд, ки кормандони Фурудгоҳи байналмилалии Душанбе ва Ширкати ҳавопаймоии «Сомон Эйр» 20-солагии Истиқлолияти давлатии кишварро бо дастовезҳои муносиб пешвоз гирифтанд. Кормандони ҳамаи хадамот ва шӯъбаҳои ФБД ва ҳайати парвозию техникии «Сомон Эйр» нақшаҳои кориро барзиёд иҷро намуданд. Манучеҳр Сафаров, яке аз аъзои ҲХДТ дар бораи сиёсати пешгирифтаи ҳизб нисбат ба ҷавонон маърӯза карда, иброз дошт, ки Хадамоти амнияти авиатсионии фурудгоҳ, ки ҳайати онро асосан ҷавонон ташкил медиҳанд, дар давраи ҳисоботӣ  сатҳи баланди касбият нишон доданд. «Ҷавонон бо дарки масъулияти ватандорӣ сиёсати пешгирифтаи ҳизбро дар амал татбиқ намуда, баҳри боз ҳам ободу зебо гардонидани Ватан ва густариши иқтисоди кишвар талош меварзанд», — гуфт зимни маърӯза котиби ибтидоии ҲХДТ дар ФБД Мӯҳтарама Муродова.Дар хотима собиқадорон ва фаъолони ҳизб бо ифтихорномаҳо сарфароз гардонида шуданд.