Баррасии масоили ҳаёти ҷавонони ИДМ дар Душанбе

Душанбе, 30 сентябр. (АМИТ «Ховар», Дилшодаи Хайруллоҳ). — Рӯзҳои 1-2 октябри соли 2011 дар бӯстонсарои Ҳукумати Ҷумҳурии Тоҷикистон ҷаласаи навбатии Шӯрои кор бо ҷавонони ИДМ  доир мегардад. Ҷаласаи мазкурро раиси Шӯрои кор бо ҷавонони ИДМ- раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Маликшо Неъматов роҳбарӣ менамояд. Дар рафти кори ҷаласа масоили мубрами ҳаёти ҷавонони кишварҳои аъзои Шӯро, аз ҷумла Тоҷикистон, Русия, Қазоқистон, Қирғизистон, Озарбойҷон, Арманистон, Белорусия, Молдова ва Украина мавриди баррасӣ қарор мегиранд.Дар назар аст, ки дар доираи ҷаласаи Шӯро мулоқоти муовини Сарвазири Ҷумҳурии Тоҷикистон Руқия Қурбонова бо роҳбарони ҳайатҳои иштирокчӣ баргузор шавад. Ёдовар мешавем, ки ҷаласаи пешини Шӯрои мазкур дар шаҳри Еревани Арманистон баргузор гардида буд ва дар рафти кори он барои фаъолияти пурсамар дар пешбурди сиёсати давлатии ҷавонон раиси Шӯрои кор бо ҷавонони ИДМ Маликшо Неъматов бо медали тиллои фахрии Вазорати ҷавонони Арманистон қадрдонӣ гардида буд.