Cӯҳбати Сафири Тоҷикистон дар шабакаи якуми телевизиони Саудия

Душанбе, 13 сентябр. (АМИТ «Ховар», Бекназари Абӯбакр). — 11 сентябри соли ҷорӣ сӯҳбати телевизионии Сафири Тоҷикистон дар мамлакати Арабистони Саудӣ Абдулло Юлдошев бо барандагони барномаи шабакаи якуми телевизиони Саудия «Субҳҳангоми Саудия» хонум Будур Аҳмад ва Абдуллои Саъдӣ давоми 20 дақиқа ба таври мустақим доир шуд. Дар оғози сӯҳбат хонум Будур Аҳмад роҳбарият ва халқи Тоҷикистонро ба муносибати ҷашни фархундаи 20-умин солгарди Истиқлоли кишвар табрик намуд.Ҳангоми сӯҳбат роҷеъ ба чор мавзӯъ саволу ҷавоб сурат гирифт: муаррифии Тоҷикистон; муносибатҳои дуҷонибаи Тоҷикистон ва мамлакати Арабистони Саудӣ; нақши фарҳангӣ ва ақоидии тоҷикон дар тамаддуни арабӣ-мусулмонӣ; ислом ва Тоҷикистон дар асри XX. Сафир қаноатмандии ҷониби Тоҷикистонро оид ба вазъи кунунии муносибатҳои дуҷонибаи Тоҷикистон ва Арабистони Саудӣ изҳор кард ва дар пешбурди онҳо нақши натиҷаҳои сафарҳо ва вохӯриҳои Президенти кишвар Эмомалӣ Раҳмон бо Подшоҳ Абдулло ибни Абдулазиз Оли Саудро аз соли 1994 то имрӯз таъкид намуд. Дипломати тоҷик ба фаъолияти Сафорати Саудия дар Тоҷикистон баҳои баланд дод ва ҳамзамон таъкид кард, ки Сафорати Ҷумҳурии Тоҷикистон дар Риёз кӯшишҳои дучанд ба харҷ хоҳад дод, то муносибатҳои дӯстонаи ду кишвар мустаҳкам ва ҳамкориҳои иқтисодии онҳо соҳаҳои ҳарчи бештарро фаро гиранд. Оид ба ислом ва Тоҷикистон дар асри XX Сафир А. Юлдошев ишора кард, ки «Исломи покиза, исломи бе олоишҳои сиёсӣ ва муғризона дар Тоҷикистон, новобаста аз баъзе ахборе, ки ҳақиқатро инъикос намекунанд, чун ҷузъи фарҳанги халқи тоҷик ба хайр аст ва ҳамин тавр хоҳад монд», — тазаккур дод ӯ.Дар охири сӯҳбат Сафир А. Юлдошев аз номи Президенти Тоҷикистон Эмомалӣ Раҳмон ба Аълоҳазрат Подшоҳ Абдулло ибни Абдулазиз Оли Сауд, аркони давлат ва халқи бародари саудӣ муваффақият ва пирӯзӣ орзу намуд.Дар ин бора ба АМИТ «Ховар» аз ВКХ ҶТ иттилоъ доданд.