Дипломатияи фарҳангии тоҷик дар амал
Душанбе, 21 сентябр. (АМИТ «Ховар», Бекназари Абӯбакр). — 19 сентябри соли 2011 дар шаҳри Брюсел Сафорати Ҷумҳурии Тоҷикистон дар Шоҳигарии Белгия дар якҷоягӣ бо Сафорати Афғонистон дар ин кишвар шаби эҷодии фарҳанги тоҷикро ташкил намуд. Дар чорабинии мазкур намояндагони доираҳои фарҳанг ва санъати Белгия, Нидерланд, Фаронса ва дигар кишварҳои Иттиҳоди Аврупо, Парлумони Аврупо ва сарпарастони аврупоӣ ширкат варзиданд. Сафири Фавқулодда ва Мухтори Ҷумҳурии Тоҷикистон Рустамҷон Солиев ва Сафири Фавқулодда ва Мухтори Ҷумҳурии Исломии Афғонистон Ҳумоён Тандар сухан гуфта, дар бораи фарҳанги кӯҳану бостонӣ ва муосири тоҷик суханронӣ намуданд. Сафирон таърихи фарҳангу санъати бойи тоҷик, саҳми тоҷиконро дар ташаккулёбии тамаддуни ҷаҳонӣ, дастовардҳои фарҳангии Тоҷикистон дар давоми солҳои истиқлолият шарҳ доданд. Дар ҷамъомад муаррифии китоби «Санъати амалӣ ва ороишии тоҷикон: дар масири қарнҳо» сурат гирифт. Дар шабнишинӣ яке аз гурӯҳҳои машҳури эстрадаи тоҷик: «Авесто» иштирокчиёнро бо сурудҳои худ шод намуданд. Инчунин дар ин шабнишинӣ намоши либосҳои миллии муосири тоҷик низ сурат гирифт. Олимон, фарҳангшиносон, санъатшиносони маъруфи Аврупо, сарпарастони аврупоӣ, намояндагони Парлумони Аврупо ба фарҳанг ва санъати тоҷик баҳои баланд доданд. Таъкид намуданд, ки дар воқеъ тоҷикон дорои фарҳангу санъати бой буда, яке аз гаҳвораи тамаддуни инсоният ба ҳисоб меравад. Онҳо изҳор карданд, ки омодаанд барои пешбурди фарҳанг ва санъати тоҷик дар арсаи Аврупо саҳм гузоранд.Дар ин бора ба АМИТ «Ховар» аз ВКХ ҶТ иттилоъ доданд.