Хатсайри нави Душанбе — Краснодар

Душанбе, 14 сентябр. (АМИТ «Ховар», Мавзуна Бойева). – Ширкати ҳавопаймоии «СомонЭйр» хатсайри нав мекушояд, ки он шаҳри Душанберо бо шаҳри Краснодари Русия пайваст менамояд. Парвози ҳавопаймоҳо дар хатсайри нав аз 6 октябр ҳар ҳафта рӯзҳои панҷшанбе сурат мегирад.
Мувофиқи ҷадвали тобистонаи парвози ҳавопаймоҳо, ки то 30 октябр давом мекунад, ҳавопаймо соати 18 ва 30 дақиқаи вақти маҳаллӣ аз шаҳри Душанбе парвоз намуда, соати 20 ва 30 дақиқаи вақти маҳаллӣ ба майдони ҳавоии Краснодар фуруд меояд.
Парвози ҳавопаймо аз шаҳри Краснодар соати 22 ва 10 дақиқа сурат гирифта, соати 03 ва 40 дақиқаи вақти маҳаллӣ ба шаҳри Душанбе мерасад.
Дар ин бора ба хабарнигори АМИТ «Ховар» котиби бахши матбуоти ширкати мазкур Темур Бандишоев иттилоъ дод.