Ордени Тоҷикистон — барои саҳми арзанда

Душанбе, 27 сентябр. (АМИТ «Ховар», Мавҷуда Анварӣ).- 26 сентябри соли 2011 дар Ню-Йорк мулоқоти Вазири корҳои хориҷии Ҷумҳурии Тоҷикистон Ҳамрохон Зарифӣ бо муовини Дабири кулли СММ, Мудири Барномаи рушди СММ Ҳелен Кларк баргузор гардид. Дар оғоз маросими супоридани Ордени Дӯстӣ ба муовини Дабири кулли СММ аз номи Президенти Ҷумҳурии Тоҷикистон баргузор гардид. Ҳелен Кларк барои саҳми арзанда дар таҳкими муносибатҳои созанда ва ҳамкориҳои гуногунҷанбаи Тоҷикистон бо Созмони Милали Муттаҳид ва ташкилотҳои дигари байналмилалӣ ва минтақавӣ, мусоидати ҳамаҷониба ба раванди рушди устувори Ҷумҳурии Тоҷикистон бо ин орден сарфароз гардид. Дар мулоқоти Ҳамрохон Зарифӣ бо Ҳелен Кларк дурнамо ва раванди татбиқи лоиҳаҳои Барномаи рушди СММ дар Тоҷикистон ва лоиҳаҳои фаромарзӣ миёни Тоҷикистону Афғонистон низ мавриди баррасӣ қарор гирифтанд.Дар ин бора ба АМИТ «Ховар» аз раёсати иттилоот, матбуот, таҳлил ва тарҳрезии сиёсати хориҷии ВКХ ҶТ иттилоъ доданд.