Анҷумани X1-уми рӯзноманигорон

Душанбе, 17 октябр. (АМИТ «Ховар», Ҳотам Рабиев).- Дар толори  маҷмааи «Шарқи озод» анҷумани 11-уми Иттифоқи журналистони Тоҷикистон баргузор гардид. Раиси Иттифоқи журналистони Тоҷикистон Акбаралӣ Сатторов таҳти унвони «Панҷ соли таҳаввулот» оид ба фаъолияти иттифоқ дар фосилаи байни анҷуманҳои 10 ва 11-ум ҳисобот дод.  Раиси Шӯрои матбуоти Тоҷикистон Зинатулло Исмоилов доир ба «Мушкилоти риоя гардидани меъёрҳои ахлоқи журналистӣ», устоди факултаи журналистикаи ДМТ Қироншоҳ Шарифзода дар мавзӯи «Аз ҳаваскорӣ ба касбият. Масъалаи тайёр кардани кадрҳои журналистӣ дар таълимгоҳҳои олӣ», раиси АМВАОМТ Нуриддин Қаршибоев дар бораи «Риояи озодии сухан ва нақзи ҳуқуқи  рӯзноманигорон дар Тоҷикистон»,  муассиси рӯзномаи «Имрӯз Нюс» Рустами Ҷонӣ перомуни «Таҷрибаи ибратомӯз. Сабақбардорӣ аз мушкилоти нахустин нашрияи ҳаррӯзаи кишвар- «Имрӯз Нюс», сармуҳаррири маҷаллаи «Офтобак» Абдувоҳиди Зевар роҷеъ ба «Мушкилоти эҷоди нашрияҳои бачагона ва ё чаро наврасон аз матбуоти худ бенасибанд?» суханронӣ намуданд. Сипас рӯзноманигорони варзида Абдуқодири Абдуқаҳҳор, Толибшоҳи Саидзода, Ҷамоли Абдулҳай, Сайёфи Мизроб ва дигарон андешаҳои худро роҷеъ ба мушкилоти рӯзмарра иброз доштанд. Анҷуман ҳайати нави раёсати Иттифоқи журналистони Тоҷикистонро дар ҳайати 19 нафар интихоб намуд. Акбаралӣ Сатторов якдилона раиси Иттифоқи журналистони Тоҷикистон  интихоб гардид.