Хатти ҳавоии Хуҷанд-Табрез кушода мешавад

Душанбе, 17 октябр. (АМИТ «Ховар», Бекназари Абӯбакр). – «Муносибатҳои минтақавӣ бо вилояти Суғд дар марҳилаи рушд қарор дошта, алҳол бо ҳамкории ширкатҳои эронӣ дар вилоят якчанд корхонаҳои истеҳсолӣ фаъолият менамоянд. Дар ояндаи наздик теъдоди ин коргоҳҳои муштарак ба маротиб афзуда, намояндагии Бонки миллии Ҷумҳурии Исломии Эрон дар шаҳри Хуҷанд ифтитоҳ хоҳад гардид», — тазаккур дод Сафири Ҷумҳурии Исломии Эрон дар Тоҷикистон Алиасқари Шеърдӯст зимни мулоқот бо Раиси вилояти Суғд Қоҳир Расулзода. Алиасқари Шеърдӯст ҳамчунин иттилоъ дод, ки дар назар аст хатти ҳавоии Хуҷанд-Табрез кушода шуда, ба пешрафти ҳамкориҳо дар самтҳои мухталифи иқтисодӣ ва иҷтимоӣ, аз ҷумла туризм ва чорабиниҳои фарҳангӣ мусоидат мекунад.Дар мулоқот аз муносибатҳои неки бародаронаи мардуми ин ду кишвар, раванди хуби густариши муносибатҳои иқтисодиву фарҳангӣ миёни Ҷумҳурии соҳибистиқлоли Тоҷикистон ва Ҷумҳурии Исломии Эрон табодули назар шуда, аз ҳамкории беғаразона ва дастгирии иҷтимоӣ, таъсиси ҷойҳои нави корӣ, иқдомоти бунёди корхонаҳои муштарак изҳори қаноатмандӣ шуд. Аз хадамоти матбуоти раиси вилояти Суғд ба АМИТ «Ховар» иттилоъ доданд, ки 14 октябр Сафири Ҷумҳурии Исломии Эрон дар Тоҷикистон Алиасқари Шеърдӯст ва намояндагони Кумитаи Имдоди Имом Ҳумайнии Ҷумҳурии Исломии Эрон ба вилояти Суғд ташриф оварда, дар ҳамоиши байналмилалии шеъри «Ҳимоят», маросими ба истифода додани шабакаи обрасонии мавзеъи 40-солагии Дилварзини ноҳияи Мастчоҳ ва якчанд чорабиниҳои фарҳангӣ ширкат варзиданд.