Истифодаи захираҳои обӣ барои рушд ва ҳифзи муҳити зист

Душанбе, 19 октябр. (АМИТ «Ховар», Мавҷуда Анварӣ). — Дар қароргоҳи шаҳрии ҳукумати ҷумҳурӣ Конфронси омодагӣ «Ба пешвози конфронси СММ оид ба рушди устувор (РИО+20): масъалаҳои марбут ба ҳамкорӣ дар соҳаи об» ба кор шурӯъ мекунад.Дар конфронс муовини сарвазири Ҷумҳурии Тоҷикистон Муродалӣ Алимардон, ҳамоҳангсози доимӣ, намояндаи доимии Барномаи рушди СММ Александр Зуев, котиби барномаи «СММ-масъалаҳои марбут ба об» Кенза Робинсон, роҳбари намояндагии САҲА дар Тоҷикистон, сафир Ивар Викки, роҳбарон ва намояндагони вазорату идораҳои Тоҷикистон ва кишварҳои Осиёи Марказӣ, инчунин дигар сохторҳои байналмилалӣ иштирок менамоянд.Тавре ки аз департаменти иттилооти Вазорати корҳои хориҷии ҷумҳурӣ иттилоъ доданд, дар конфронс баррасии масоили марбут ба манбаъҳои оби минтақа, аз ҷумла истифодаи таҷрибаи пешқадами ҳамкорӣ дар соҳаи об дар сатҳи маҳаллӣ, миллӣ ва минтақавӣ, масоили беҳбуди дастрасӣ ба оби ошомиданӣ, пешбурди истифодаи захираҳои обӣ барои рушд ва ҳифзи муҳити зист ва ғайра дар назар аст.