Изҳороти Ҳукумати Ҷумҳурии Тоҷикистон

Октябрь 26, 2011 10:19

Душанбе, 26 октябр. (АМИТ «Ховар»). – Вақтҳои охир  дар  васоити  ахбори оммаи  баъзе  кишварҳои  минтақа маълумоти таҳрифомез  дар  мавриди  лоиҳаи  бунёди  НОБ  Роғун паҳн  карда  мешавад. Бояд  мавқеи тағйирнопазири  роҳбарияти Тоҷикистонро  дар  мавриди он  қайд  намуд, ки  татбиқи  лоиҳаи гидроэнергетикӣ  ва  дар навбати  аввал  анҷом  додани сохтмони  НОБ Роғун  бо назардошти  манофеи  умумимиллӣ  ва  минтақавӣ  сурат  гирифта,  Тоҷикистон  тайёр  аст, ки  дар  ин  масъала  бо  ҳамсояҳояш  ба таври  зичтарин  ҳамкорӣ  намояд. Президенти  мамлакат  Эмомалӣ  Раҳмон,  аз ҷумла, аз  минбарҳои  иҷлосияҳои  63  ва  64  — уми  Ассамблеяи  Генералии  СММ,  ҳамчунин ҳамоиши  Копенгаген  аз рӯи  масъалаи  тағйири  иқлим  ва форумҳои  дигари   байналмилалӣ  перомуни  масъалаи  об тӯли  солҳои охир  дар  ин  бора изҳорот  дода  буд. Имконияти  техникӣ, судмандии иқтисодӣ,  амнияти  экологии  НОБ  Роғунро  борҳо  санҷиданд  ва  ин  лоиҳа  ягон  маротиба  баҳои  манфӣ  нагирифта буд,  вале Ҳукумати  Ҷумҳурии  Тоҷикистон  иродаи  нек  ва саъю кӯшишҳо  барои  анҷом  додани  гуфтугӯи  ошкорову  шаффоф  бо  ҳамаи  ҷонибҳои  манфиатдорро   нишон  дода,  аз Бонки Умумумиҷаҳонӣ, ки  ба  ҳайси  сохтори  ваколатдори  СММ  пешниҳод  гардидааст, хоҳиш  намуд, ки  боз  як таҳқиқи мустақили байналмилалии  лоиҳаи  анҷоми  бунёди  НОБ – ро гузаронад. Ҷавобан  ба  ин  дархост  бо  дастгирии  Бонки  Умумумиҷаҳонӣ  асосноккунии  техникию  иқтисодӣ  ва  арзёбии  таъсири  экологию  иҷтимоӣ  муваффақона  сурат  гирифта,  ҳамзамон  ду  гурӯҳи  коршиносони  мустақили  байналмилалӣ,  яке  аз рӯи  масъалаҳои  дорои   хусусияти  техникию  иқтисодӣ  ва  бехатарии  сарбанд ва  дигаре  аз рӯи  хусусияти  иҷтимоию экологӣ кор  мекунанд. Ҳукумати Ҷумҳурии  Тоҷикистон аз рӯи  натиҷаи  тадқиқоти   зикршуда бо  мушовирони  байналмилалӣ,  гурӯҳи  коршиносони  байналмилалӣ, Бонки  Умумиҷаҳонӣ  ва  аҳли  ҷамъияти  кишварҳои  поёноб  самарабахш  ҳамкорӣ  дорад. Маълумоти  зикршуда   доираи    васеи  масъалаҳо,  аз ҷумла,  масоили  бехатарӣ, талофият,  мӯҳлати  бо  об  пур  кардани  обанбор,  идораи  захираҳои об, таъсири  иҷтимоию  экологиро  фаро гирифта, биноан муболиғаҳои паҳнкардаи баъзе  ҷонибҳо  набояд  хавферо  ба  миён  оранд. Ҳукумати  Ҷумҳурии  Тоҷикистон тибқи  мувофиқа  бо   мушовирони  байналмилалӣ,  гурӯҳи  коршиносон  ва  мутахассисони  Бонки  Умумиҷаҳонӣ  сохтмони тамоми  маҷмӯи  лоиҳаро  баррасӣ  менамояд  ва  сухан  дар  бораи  ягон  сохтмони  фосилавии  марҳилаи  аввали  НОБ  намеравад. Тоҷикистон  барои  анҷоми муваффақонаи  арзёбӣ  ба  мушовирони  байналмилалӣ  ҳамаҷониба  мусоидат  намуда ва  интизори натиҷаи таҳқиқи  байналмилалӣ  шуда,  ҳамзамон  корҳои  тармиму таҷдидро  дар  ҳудуди  НОБ  Роғун роҳандозӣ   мекунад. То имрӯз  байни  консорсиум  ва  ҷониби  Тоҷикистон  ягон  ихтилофоти  ҷиддӣ  вуҷуд  надошт. Ҷумҳурии  Тоҷикистон  дар амри татбиқи   лоиҳаи  мазкур  умуман  ҷонибдори аҳду  паймонҳои  қаблӣ  буда, принсипҳои   шаффофият  ва идораи корпоративиро  тарафдорӣ карда,  қоидаҳои  амалкунандаи  Бонки  Умумиҷаҳониро  риоя  менамояд.

Октябрь 26, 2011 10:19

Хабарҳои дигари ин бахш

Имрӯз дар шаҳри Душанбе ҳаво то 37 дараҷа гарм мешавад
Омодагӣ ба соли нави хониш дар ҷаласаи Кумита оид ба таҳсилоти ибтидоӣ ва миёнаи касбӣ баррасӣ шуд
Масъалаи ташкили ковишҳои бостоншиносӣ дар мавзеи «Дараи Алмосӣ» баррасӣ гардид
Имрӯз дар ноҳияҳои алоҳидаи кӯҳӣ борони кӯтоҳмуддат меборад
Дар Хуҷанд барои пешгирии бемориҳои сироятӣ вохӯрӣ доир гардид
Баланд бардоштани маърифати ҳуқуқӣ заминаи боэътимоди рушди босуботи ҷомеа мебошад
Истифодаи самараноки заминҳои наздиҳавлигӣ заминаи хуби фаровонҳосилӣ ва таъмини амнияти озуқаворӣ аст
Имрӯз дар Тоҷикистон ҳарорати ҳаво ба 38 дараҷа мерасад
ИСТИФОДАИ БОСАМАРИ ЗАМИН. Сокини деҳаи Гулистони ноҳияи Кӯшониён аз замини наздиҳавлигӣ ду-се ҳосил ба даст меорад
Дар шаҳри Гулистон сохтмони корхонаҳо ва васлу насби дастгоҳу таҷҳизоти муосир идома дорад
Бо ташаббуси Кумитаи иҷроияи Ҳизби Халқии Демократии Тоҷикистон дар вилояти Хатлон оид ба китобу китобхона ташаббусҳои ҳизбӣ доир мегарданд
Ҳамкории Литсейи касбии техникии нақлиёти роҳи оҳани Душанбе ва Донишгоҳи давлатии Кубан тақвият меёбад