Муносибатҳои кишоварзиро бо Афғонистон ба роҳ монем

Кӯлоб, 20 октябр. (АМИТ «Ховар»,   Сулаймон   Холов).- Бо мақсади беҳтар ба роҳ мондани масоили хариду фурӯши маҳсулоти кишоварзӣ байни истеҳсолкунандагони тоҷику афғон ва дурнамои ин соҳа,  бо дастгирии мақомоти иҷроияи ҳокимияти давлатии ноҳияи Ҳамадонӣ ва ташкилоти ҷамъиятии «Зан ва замин» дар ноҳияи Ҳамадонӣ мизи мудаввар баргузор гардид, ки дар он роҳбарони созмонҳои байналхалқии муқими Тоҷикистон, ташкилотҳои ҷамъиятии Тоҷикистону Афғонистон, олимону мутахассисони соҳа ва роҳбарони хоҷагиҳои деҳқонӣ ширкат варзиданд.  Зикр  шуд, ки ба анвои гуногуни маҳсулоти кишоварзие, ки дар ноҳияи Ҳамадонӣ ва дигар ноҳияҳои ҳамсарҳад бо Давлати Исломии Афғонистон истехсол мешаванд, дар бозорҳои Афғонистон талабот хеле зиёд аст. Инчунин таҷрибаи кишоварзони тоҷик, алалхусус тухмипарварию нихолпарварӣ метавонад дар беҳтар гардидани фаъолияти деҳқонони давлати ҳамсоя ва рӯёнидани ҳосили зиёд кӯмак расонад. Ширкатдорон барои беҳтар ба роҳ мондани муносибатҳои тиҷоратӣ  ташкили бозорҳои муштарак ва марказҳои тиҷоратиро дар шафати  бандарҳои «Шерхон» ва «Кокул»    зарур шумориданд.