Нишондиҳандаҳои макроиқтисодӣ чӣ гуна аст?

Душанбе, 26 октябр.(АМИТ «Ховар», Марзия Саидова).- «Дар 9 моҳи соли равон ҳаҷми маҷӯи маҳсулоти дохилӣ дар кишвар ба 20 миллиард сомонӣ расонида шуд ва суръати афзоиши он 7,5 фоизро ташкил намуд, ки ин нисбат ба ҳамин давраи соли гузашта 3 миллиард сомонӣ зиёд аст». Ин нукта зимни муҳокимаи парлумонии самтҳои иҷрои Буҷаи давлатии Ҷумҳурии Тоҷикистон барои соли 2011 дар зарфи 9 моҳи соли равон зикр шуд. Дар ин давра афзоиши ҳаҷми истеҳсолот дар тамоми соҳаҳо таъмин гардид. Хусусан, истеҳсоли маҳсулоти саноатӣ 5,5 %, кишоварзӣ 9,9%, гардиши моли чакана 9% , хизматрасониҳои пулӣ 13,4 % ва сохтмон 10,4% нисбат ба ҳамин давраи соли 2010 афзоиш ёфтаанд. Музди миёнаи моҳонаи як коргар ба 420 сомонӣ баробар гардида, афзоиши реалии он 9,5%-ро ташкил дод, ки ин нисбати ҳамин давраи соли гузашта 82,2 сомонӣ зиёд аст. Сафаралӣ Раҷабов, Раиси кумитаи иқтисод ва молияи Маҷлиси намояндагон гуфт, ки мусбат арзёбӣ шудани нишондиҳандаҳои макроиқтисодӣ ва чораҳои андешидаи Вазорати молияи ҷумҳурӣ, Кумитаи андоз ва Хадамоти гумруки назди Ҳукумати ҷумҳурӣ дар ҳамбастагӣ бо вазорату идораҳои марбута имкон дод, ки буҷаи давлат ба андозаи беш аз 100 % таъмин карда шавад. Ба буҷа 6,1 миллиард сомонӣ ворид карда шуд, ки он қиёсан ба ҳамин давраи соли 2010 ба маблағи 1,8 миллиард сомонӣ зиёд мебошад. Иҷрои даромади ҷории Буҷаи давлатӣ 103,9 % ё ба маблағи 4,8 миллиард сомонӣ таъмин гардид, ки нисбат ба нақша ба маблағи 180,4 миллион сомонӣ афзоишро нишон медиҳад. Дар муҳокимаи парлумонӣ вазири молияи ҷумҳурӣ Сафаралӣ Наҷмиддинов, раиси Кумитаи андоз Нусратулло Давлатов ва сардори Хадамоти гумруки назди Ҳукумати ҷумҳурӣ Гурез Зарифов дар назди вакилони Маҷлиси намояндагон оид ба иҷрои Буҷаи давлатииҶумҳурии Тоҷикистон барои соли 2011 дар 9 моҳи соли 2011 баромад намуда, доир ба дастоварду камбудиҳои мавҷуд дар ин соҳаҳо маълумот доданд.10.02.