«Нурафзо»- ташхисгари беҳтарин

Душанбе, 13 октябр. (АМИТ «Ховар», Дилшодаи Хайруллоҳ). -Маркази ташхиси «Нурафзо» дар  муддати кӯтоҳ аз ҷониби як гурӯҳ соҳибкорони ватанӣ бунёд гардида, дорои  технологияи  муосири ташхис, аз қабили дастгоҳи магниту резонансии «Магнитом-С», ултрасадо ё худ УЗИ, компютери томографӣ, рентген ва дигар дастгоҳҳои зарурӣ  мебошад. Масъулини Вазорати тандурустӣ зимни ифтитоҳи Маркази мазкур  иброз доштанд, ки тайи солҳои охир  бо дастгирии Ҳукумати    Ҷумҳурии Тоҷикистон ва ҷалби сармояи дохиливу хориҷӣ бо бунёди чунин марказҳо сатҳи хизмарасонии тиббӣ дар мамлакат беҳтар гардид.  Дастгоҳҳои муосири  ташхис, ки имрӯз дар марказ мавҷуданд, истеҳсоли ширкатҳои соҳибнуфузи Олмону Амрико ва Ҷопон мебошанд. Ба гуфти табибон компютери томографие, ки дар ин ҷо насб гардидааст, метавонад дар як сония 16 ҳолати узви бадани инсонро аксбардорӣ намуда, ҷойҳои нуқсдоштаро муайян созад. Дастгоҳи   магниту резонансии «Магнитом-С» то ин замон дар ҷумҳурӣ як адад буд. Пештар  беморон   барои ташхиси майнаи сар ва сутунмӯҳра  ба хориҷи кишвар сафар мекарданд, ки он хароҷоти зиёди молӣ дошт.Дар Маркази ташхиси «Нурафзо» беморони гирифтори буғумдард, бемориҳои ҷигару талхадон, меъдаву рӯда ва гурда  ташхис карда мешаванд.Дар оянда муассисони ин Марказ ният доранд барои осонии кори табибону беморон дар шабакаи ҷаҳонии Интернет маркази ягонаи иттилоотиро  таъсис диҳанд, ки дар он таърихи рӯз ва натиҷаи  ташхис, роҳҳои табобат ва дигар маълумоти зарурӣ дар бораи бемор   сабт мегардад.