О. Оқилов К. Ромодановскийро пазируфт

Душанбе, 21 октябр. (АМИТ «Ховар», Дилшодаи Хайруллоҳ). —  Имрӯз мулоқоти Сарвазири Ҷумҳурии Тоҷикистон Оқил Оқилов бо Роҳбари хадамоти федеролии муҳоҷирати Федератсияи Русия Константин Ромодановский, ки барои иштирок дар ҷаласаи навбатии Шӯрои роҳбарони хадамоти муҳоҷирати давлатҳои узви ИДМ ба  Душанбе омадааст, баргузор гардид.Дар мулоқот масоили марбут ба ҳамкориҳои Тоҷикистон ва Федератсияи Русия дар бахши муҳоҷирати шаҳрвандон ва  ҳифзи ҳуқуқу манфиатҳои муҳоҷирони корӣ  мавриди баррасӣ қарор гирифт.Оқил Оқилов таъкид кард, ки дар Тоҷикистон ба масъалаи дарёфти роҳу усулҳои наву беҳтари  идоракунии раванди муҳоҷирати кории шаҳрвандон таваҷҷӯҳи зарурӣ зоҳир карда мешавад ва  ба ҳамин хотир дар мамлакат сохтори алоҳида оид ба масъалаҳои муҳоҷират таъсис ёфта, «Стратегияи миллии муҳоҷирати кории шаҳрвандони Ҷумҳурии Тоҷикистон ба хориҷи кишвар барои солҳои  2011-2015» қабул гардидааст. Аз ифтитоҳи маркази ҳуҷҷатгузории муҳоҷирони корӣ дар шаҳри Санкт-Петербурги Федератсияи Русия  изҳори қаноатмандӣ карда шуда таъкид гардид, ки ифтитоҳи чунин марказҳо дар дигар шаҳрҳои Федератсияи Русия дар раванди ҳифзи ҳуқуқу манфиатҳои муҳоҷирон дигаргуниҳои куллиро ба вуҷуд хоҳад овард.