Омодагӣ ба зимистонгузаронӣ

Душанбе, 7 октябр. (АМИТ «Ховар», Мавҷуда Анварӣ). — Бо ҳадафи таъмини фаъолияти мунтазам ва самараноки соҳаҳои иқтисодиёт ва иҷтимоиёти ҷумҳурӣ, ҳамзамон хубу беталаф гузаронидани фаслҳои тирамоҳу зимистони дарпешистода мақомоти иҷроияи ҳокимияти давлатии шаҳру навоҳии вилояти Суғд чораҳои мушаххас меандешанд. Корхонаи фаръии шабакаҳои гармидиҳии шаҳри Хуҷанд дар мавсим дегхонаҳои Беморхонаи клиникавии бачагонаи вилоятӣ, беморхонаи клиникавии шаҳрии №1-ро бо сӯзишвории алтернативӣ, яъне ангиштсанг ба кор омода намуд. Инчунин дегхонаи беморхонаи клиникавии рақами 2-юми шаҳр барои истифода тайёр мебошад. Тибқи нақша-чорабинӣ аз ҷониби муассисаи кабудизоркунӣ бояд 80 метри мукааб ҳезум захира мекард. Вале то имрӯз 13 метри мукааб ҳезум захира шудаасту халос. Аз тарафи корхонаҳои давлатии истифодабарии манзили соҳили чапу рости Сирдарё ба масоҳати 11 ҳазору 460 метри мураббаъ таъмири боми хонаҳои баландошёна ба нақша гирифта шудааст, ки айни замон ин кор дар масоҳати 8 ҳазору 70 метри мураббаъ иҷро гардидааст. Бояд тазаккур дод, ки масъалаҳои омодагии саривақтӣ ба давраи тирамоҳу зимистонгузаронии солҳои 2011-2012 дар мадди назари кормандони ситоди шаҳрӣ таҳти сарварии Раиси шаҳр Содиқ Мирхолиқов қарор дошта, корҳои нақшавӣ тадриҷан амалӣ мешаванд.