Зафари пахтакорони ҷумҳурӣ ва ҳосилнокии рекордӣ

Душанбе, 17 октябр. (АМИТ «Ховар», Фарҳоди Шомаҳмад).-   Новобаста аз мушкилоти пешомада, аз ҷумла камборишӣ  деҳқонони ҷумҳурӣ  тавонистанд тўли 20-соли соҳибистиқлолии  Тоҷикистон имсол бори аввал аз ўҳдаи фатҳи дурнамои  истеҳсоли пахта сарбаландона бароянд. Соли ҷорӣ деҳқонони мамлакат бо истифода аз таҷрибаи пешқадами агротехникӣ ва тухмиҳои серҳосили ватаниву хориҷӣ дар майдони зиёда аз 200 ҳазор гектар чигит кишт намуданд. Тибқи маълумоти фаврии Вазорати кишоварзии Ҷумҳурии Тоҷикистон деҳонони  Тоҷикистон то санаи 17-уми октябр дар як рўз 2 ҳазору 297 тонна ва аз аввали мавсим 391 ҳазору 291 тонна пахта ба хирмани ватан ворид намуданд. Ин нишондод нисбат ба ҳамин давраи соли сипаригардида 125 ҳазору 733 тонна зиёд аст. Қобили зикр аст, ки дар Тоҷикистони даврони соҳибистиқлолӣ ҳосилнокии майдони пахта бори аввал аз бист сентнер ҳам мегузарад.  Аксарияти хоҷагиҳои деҳқонӣ ин қулларо фатҳ намуда, чанде аз онҳо ҳосилнокии рекордӣ, яъне аз як гектар аз 35 то 50 сентнерӣ ҳосили пахта ба даст оварданд. Дар ин бора ба хабарнигори АМИТ «Ховар» аз шӯъбаи матбуотии Вазорати кишоварзии Ҷумҳурии Тоҷикистон иттилоъ доданд.