Ганҷи Ванҷро барои ободӣ истифода бояд кард

Душанбе, 14 ноябр. (АМИТ «Ховар», Лаззат Диловарзод).- Ба гуфти олими соҳаи геология ва минерологияи собиқ Иттиҳоди Шӯравӣ Осколков. В.А, хосиятҳои ороишии мармарҳои Ағаҷал (Суғд), Кабудӣ (Варзоб), Даштак (Ванҷ), оҳаксанги мармардори Далёни Боло (Ғончӣ), грандиорити Мевагул (Хуҷанд), конгломерати рангаи Такслӣ (Мастчоҳ), оҳаксанги Навобод (Истаравшан) ва санги хорои Шайдон (Ашт) ҷавобгӯи тамоми меъёрҳои ҷаҳонӣ мебошанд.Ба ақидаи олим кони мармари сафеди Даштаки Ванҷ, ки дар канори шоҳроҳи Душанбе – Қалъаихумб – Хоруғ воқеъ аст, сафедии он ба коғази абрешимӣ рақобат мекунад.Дар даврони шӯравӣ ягона корхонаи коркарди мармар дар ноҳияи Ванҷ фаъолият дошт ва мармари коркардшудаи он рӯйпӯши баъзе истгоҳҳои метрои Маскав ва Санкт- Питербургро оро медод.Ҳоло ин корхона хусусӣ шуда, аз фаъолият мондааст. Ин корхонаро метавон бо ёрии ҳукумати ноҳия ва соҳибкорони он эҳё намуда, Ванҷро бо ин ганҷаш обод намуд. Дар сурати эҳёи корхонаи мармар аз даромади он нафақат буҷаи ноҳия, балки буҷаи ҷумҳурӣ низ миллионҳо сомонӣ фоида дида, даҳҳо қасру хиёбон ва куӯчаю майдонҳои пойтахт ва марказҳои шаҳру ноҳияҳо зебу оро дода хоҳанд шуд. Ин дар суратест, ки айни замон сангҳои ороишии Ҷумҳурии Тоҷикистон коркард нашуда, сангҳои ороишии сифатан паст аз Ҷумҳурии Мардумии Чин ба Тоҷикистон ворид карда мешаванд.