Семинари амалӣ

Душанбе, 17 ноябр. (АМИТ «Ховар», Лутфия Эшонқулова). — Имрӯз, 17 ноябр, дар шаҳри Душанбе семинари амалии намояндагони баландпояи ҳукумат дар мавзӯи «Муҳоҷират ва нақшаи стратегии муваффақият» ба кораш шурӯъ кард.Ин чорабинӣ бо ибтикори намояндагии доимии Бонки Ҷаҳонӣ дар Тоҷикистон якҷоя бо Хадамоти муҳоҷирати назди Ҳукумати Ҷумҳурии Тоҷикистон сурат мегирад. Тавре дар маркази матбуоти Хадамоти муҳоҷират ба АМИТ «Ховар» иттилоъ доданд, дар ҷараёни семинар мушовири Бонки Ҷаҳонӣ оид ба масоили муҳоҷират собиқ вазири хадамоти муҳоҷирати Филиппин Томас Ачакосо аз таҷрибаи худ перомуни идора ва танзими равандҳои муҳоҷирати меҳнатӣ суханронӣ мекунад. Дар семинар масоили мазмуну рушди муҳоҷирати меҳнатӣ дар Тоҷикистон, аҳамияти муҳоҷирати меҳнатӣ барои кишвар, дастгирии муҳоҷирон ва таъминоти иҷтимоии онҳо, ҳамчунин як қатор масъалаҳои дигар мавриди баррасӣ қарор мегиранд.Дар семинар вазирон, роҳбарони идораҳои давлатӣ, раисони вилоятҳо ва шаҳру ноҳияҳои ҶТ иштирок менамоянд. Семинар корашро то 18 ноябр давом медиҳад.