Ҳисоботи шаҳрдор оид ба нақшаҳои рушд

Душанбе, 5 декабр. (АМИТ «Ховар», Марзия Саидова).- 22 декабри соли 2011 дар шаҳри Душанбе иҷлосияи ҳаштуми Маҷлиси вакилони халқи шаҳри Душанбе даъвати чорум баргузор мегардад. Дар ин хусус Раиси Маҷлиси вакилони халқи шаҳри Душанбе, раиси шаҳри Душанбе Маҳмадсаид Убайдуллоев қарори марбутаро ба имзо расонд. Интизор меравад, ки дар иҷлосия дар назди вакилони шаҳрӣ Раиси шаҳри Душанбе Маҳмадсаид Убайдуллоев оид ба иҷрои барномаҳои иҷтимоию иқтисодии шаҳри Душанбе дар соли 2011, нақшаҳои рушд, буҷаи шаҳри Душанбе ва вазифаҳои мақомоти иҷроияи маҳаллии ҳокимияти давлатӣ дар шаҳри Душанбе барои соли 2012 ва иҷрои буҷаи шаҳри Душанбе дар соли 2010 ҳисобот медиҳад. Ҳамзамон дар иҷлосияи шаҳрӣ як қатор қарорҳои раиси шаҳри Душанбе тасдиқ хоҳанд шуд.