Густариши ҳамкориҳои ҳарбии Тоҷикистону Покистон

Душанбе, 22 декабр. (АМИТ «Ховар», Анварбек Сиддиқов).- 22 декабр дар Вазорати мудофиаи Ҷумҳурии Тоҷикистон вохӯрии вазири мудофиаи ҷумҳурӣ Шералӣ Хайруллоев бо раиси Кумитаи сардорони Ситоди муттаҳидаи Қувваҳои мусаллаҳи Ҷумҳурии Исломии Покистон Ҳалид Шамим Вайне, ки дирӯз бо сафари расмӣ ба Ҷумҳурии Тоҷикистон ташриф оварда буд доир гардид.Тавре ки аз сардори маркази матбуоти Вазорати мудофиаи ҷумҳурӣ Фаридун Маҳмадалиев ба АМИТ «Ховар» иттилоъ дод, зимни мулоқот Шералӣ Хайруллоев ва Ҳалид Шамим Вайне масоили вобаста ба авзои минтақаи Осиёи Марказӣ, вазъи кунунии давлати Афғонистон ва Қувваҳои мусаллаҳи ҷумҳуриро муҳокима карда, ҷонибҳо аз сатҳи ҳамкориҳои низомии ду кишвар изҳори қаноатмандӣ намуданд ва рушди минбаъдаи онро самаранок арзёбӣ карданд. Инчунин дар вохӯрӣ доираи васеи масоили ҳамкориҳои ҳарбӣ ва ҳарбию техникӣ, иқтисодӣ, омодасозии кадрҳои низомӣ, табодули иттилоту таҷрибаомӯзӣ дар муборизаи муштараки зидди террористӣ ва дигар масъалаҳои марбут ба густариши минбаъдаи муносибатҳои низомӣ мавриди баррасӣ гирифтанд. Дар ҷараёни сафари расмӣ раиси Кумитаи сардорони Ситоди муттаҳидаи Қувваҳои мусаллаҳи Ҷумҳурии Исломии Покистон бо сардори ситоди генералии Қувваҳои мусаллаҳи ҶТ Рамил Нодиров вохӯрӣ намуда, аз пойгоҳи Донишкадаи ҳарбии Вазорати мудофиаи Ҷумҳурии Тоҷикистон дидан ба амал овард ва бо ҳайати афсарону устодон ва донишҷӯён мулоқот намуд.