Сокинони пойтахт 71 фоизи маблағи истифодаи барқро пардохтаанд

Душанбе, 8 феврал. (АМИТ «Ховар», Кристина Эрлих ). – Шабонарӯзҳои гузашта сокинон ва корхонаҳои шаҳри Душанбе 14 миллиону 659 ҳазор киловатт – соат нерӯи барқро истифода намуданд, ки ин назар ба рӯзҳои гузашта қариб 1 миллион киловатт – соат зиёд аст. Дар ин бора ба АМИТ «Ховар» дар маркази матбуоти ШСХК «Барқи тоҷик» хабар доданд. «Дар ҳоли ҳозир қувваи барқ ягона манбаи гармидиҳӣ ва равшанӣ ба шумор меравад. Вале аҳолии шаҳри Душанбе ба қадри кофӣ нерӯи барқро дастрас намуда, сари вақт пардохт намудани маблағи истифодаи онро фаромӯш мекунанд», — зикр намуданд дар хадамоти матбуоти ширкати мазкур.Масалан, моҳи январ аҳолии шаҳри Душанбе нерӯи барқро ба маблағи 19 миллиону 588 ҳазор сомонӣ истифода намуда, вале ҳамагӣ 13 миллиону 90 ҳазор сомонӣ пардохт кардаанд, ки ин фақат 71 фоизро ташкил медиҳад.