Истеҳсоли масолеҳи сохтмонӣ меафзояд

Душанбе, 15 март. (АМИТ «Ховар», Кристина Эрлих). – Тавре дар Вазорати энергетика ва саноати ҶТ ба АМИТ «Ховар» хабар доданд, дар Тоҷикистон истеҳсоли масолеҳи сохтмонӣ, аз ҷумла хишту шиша меафзояд. Мувофиқи суханони манбаъ, сабаби афзоиш ёфтани масолеҳи сохтмонӣ дар навбати аввал мавриди истифода қарор гирифтани корхонаҳои нави истеҳсолкунандаи масолеҳи сохтмонӣ ба афзудани талаботи ҷумҳурӣ ба ин маҳсулот мебошад. Масалан, тайи ду моҳи соли ҷорӣ дар ҷумҳурӣ беш аз 1 миллиону 500 ҳазор дона хишт истеҳсол гардид, ки назар ба ҳамин давраи соли 2011 баробари 655 ҳазор дона зиёд аст. Ҳамчунин истеҳсоли шишаи сохтмонӣ ва шифер афзоиш ёфт.«Тайи соли 2012 дар ҷумҳурӣ қариб 20 корхонаи истеҳсолкунандаи масолеҳи сохтмонӣ, аз қабили хишт, санги мармар, семент ва шиша ба истифода дода хоҳад шуд», — афзуд манбаъ.