Сайри Наврӯз дар Аврупо

Душанбе, 13 март. (АМИТ «Ховар», Пайрав Назаров). – Бо ибтикори Сафорати Ҷумҳурии Тоҷикистон дар Шоҳигарии Белгия 21 март дар Қасри «Palais de Colonies» якҷоя бо сафоратҳои Озарбойҷон, Афғонистон, Қазоқистон, Қирғизистон ва Туркманистон, ҳамчунин бо иштироки намояндагони олимақоми Иттиҳоди Аврупо, НАТО ва ташкилотҳои дигари байналмилалӣ, намояндагони мӯътабари доираҳои сиёсӣ, иқтисодӣ, молиявӣ, фарҳангӣ, илмӣ, васоити ахбори омма, сафирон ва дипломатҳои муқими шаҳри Брюссел Рӯзи байналмилалии Наврӯз таҷлил мешавад. Сафорати Тоҷикистон ҳамчунин 21 марти соли равон якҷоя бо Ҷамъияти тоҷикон дар Фаронса ва Ассотсиатсияи «Наврӯз» — и Фаронса дар назди бурҷи Эйфели шаҳри Париж Рӯзи байналмилалии Наврӯзро ид мекунад.