Маҳсулотро дар хона истеҳсол мекунанд

Хоруғ, 5 апрел. (АМИТ «Ховар», Л.Додо). – Сокинони ҷамоати деҳоти Рангкӯли ноҳияи Мурғоб асосан ба парвариши кӯтос ва бузу гӯсфанд машғуланд. Солҳои 90 – уми қарни гузашта бар асари бесарусомонӣ пӯсту пашми чорвои зикршуда дар анборҳо мепӯсид. Ҳоло вазъият дигар шудааст. Акнун сокинони ҷамоати мазкур аз фурӯши маҳсулоти чорво рӯз гузаронида ва аз ашёи хом маҳсулоти хоси миллӣ тайёр мекунанд.Бо ҷудо гардидани грантҳои президентӣ, имдоди доимии мақомоти маҳаллии ҳокимияти давлатии ноҳия ва дастгирии соҳибкорӣ ашёи хом на танҳо аз нобудшавӣ раҳо гардид, балки ба яке аз василаҳои пешбурди зиндагии мардум низ табдил ёфт.