Паёми Сарвари давлат ба МО ҶТ

Душанбе, 19 апрел.(АМИТ «Ховар», Марзия Саидова).- Фардо -20 апрели соли 2012 дар шаҳри Душанбе ҷаласаи сеюми муштараки Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон, даъвати чорум баргузор мегардад. Дар ҷаласаи муштараки палатаҳои парлумони мамлакат Президенти ҷумҳурӣ Эмомалӣ Раҳмон ба парлумони кишвар Паёми навбатии худро ироа месозад, ки он фарогири самтҳои афзалиятноки сиёсати дохилӣ ва хориҷии Ҷумҳурии Тоҷикистон аст. Ҷараёни Паёми Сарвари давлат ба МО ҶТ аз тариқи ҳамаи шабакаҳои телевизионӣ мустақиман намоиш дода мешавад. Дар ин хусус ба АМИТ «Ховар» аз палатаи поёнии парлумони кишвар иттилоъ доданд. Ба ҷаласаи сеюми муштараки Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон даъвати чорум ғайр аз аъзои палатаи болоӣ ва вакилони палатаи поёнии парлумони мамлакат, инчунин намояндагони ҳукумати кишвар ва корпусҳои дипломатии муқими Тоҷикистон ва намояндагони васоити ахбори омма даъват шудаанд. Бояд тазаккур дод, ки Сарвари давлат дар Паёми қаблии худ ба парлумони мамлакат таваҷҷӯҳи махсусро ба рушди устувори иқтисодиёти миллӣ нигаронида буд. Президенти Тоҷикистон Эмомалӣ Раҳмон гуфта буд, ки рушди устувори соҳаҳои иқтисодиёти кишвар ва нақшаҳои пешбинишуда дар доираи се ҳадафи стратегӣ: таъмини истиқлолияти энергетикӣ, раҳоии кишвар аз бунбасти коммуникатсионӣ ва таъмини амнияти озуқаворӣ таҳия шудаанд. Ҳамзамон Президенти мамлакат ба аҳамияти зиёди ҳифзи манфиатҳои миллӣ, таъмини суботи сиёсӣ, ваҳдати миллӣ ва тақвияти амният дар кишвар махсус таъкид намуда буд, ки татбиқи ин равандҳо, бешак, ба рушду устувор ва пешрафту шукуфоии сарзаминамон мусоидат менамоянд.