Рӯзҳои оянда ҳавои кишвар боронист

Душанбе, 27 апрел.(АМИТ «Ховар», Марзия Саидова).-Рӯзҳои 27-28 ва 29 апрел дар ҷумҳурӣ, хусусан дар минтақаи ҷануби кишвар-гурӯҳи ноҳияҳои вилояти Хатлон ва ноҳияҳои тобеи марказ боронҳои пуршиддат борида, дар натиҷа сел меояд. Парвина Саидҷамолова, мудири шӯъбаи пешгӯии боду ҳавои Муассисаи давлатии ҳавошиносии ҷумҳурӣ иттилоъ медиҳад, ки бо ворид шудани ҳавои пуршиддати рутубатноки атлантикӣ, аз 21 апрел инҷониб дар ҷумҳурӣ ҳаво абрноку боронист ва ҳарорати ҳаво нисбат ба ҳафтаи қаблӣ то 10-12 дараҷа поён фаромадааст. Мутахассиси бахши ҳавошиносии кишвар меафзояд, ки дар шароити иқлими Тоҷикистон аслан моҳҳои апрел ва май сербориш буда, боронҳои пай дар пайи ҳафтаи охир ҳолати муқаррарист. Ҳаво дар ин давра дар вилояти Суғд шабона 8-13 ва рӯзона 17-22 дараҷа гарм, дар вилояти Хатлон шабона 9-14 рӯзона 18-23 дараҷа гарм мешавад. Ҳарорати ҳаво дар ғарби Вилояти Мухтори Кӯҳистони Бадахшон шабона 7-12 ва рӯзона 12-17 дараҷа гарм, дар шарқи ҳамин вилоят шабона 0-5 дараҷа сард ва рӯзона 2-7 дарҷа гарм мешавад. Ҳарорати ҳаво дар ноҳияҳои тобеи марказ шабона 7-12 ва рӯзона 14-19 ва дар пойтахти ҷумҳурӣ шабона 10-12 ва рӯзона 17-19 дараҷа гарм мешавад.