Ҳавои гарми Саудӣ ба сўи Тоҷикистон ҳаракат менамояд

Душанбе, 5 июл.(АМИТ «Ховар», Марзия Саидова).- Ҳавошиносони кишвар ҳаракати ҳавои гарми биёбониро аз сўи нимҷазираи Арабистони Саудӣ ба сўи кишвараҳои минтақаи Осиёи Марказӣ, аз ҷумла Тоҷикистон пешгўӣ менамоянд.  Парвина Саидҷамолова, мудири шўъбаи пешгўии обу ҳавои Муассисаи давлатии обуҳавошиносии кишвар мегўяд, ки бо ҳаракати ҳавои гарми Саудӣ ба Тоҷикистон, ки он рўзҳои 9, 10 ва 11 июл дар назар дошта шудааст, ҳарорати ҳаво нисбат ба рўзҳо феълӣ то се чор дараҷа боло рафта, дар пойтахт –шаҳри Душанбе рўзона ҳарорат аз 40 дараҷа боло меравад, дар қисмати ҷанубии кишвар гармии ҳаво ба 45 дараҷа мерасад. Дар ин давра ҳарорати ҳаво дар вилояти Суғд шабона 19-24 рўзона 39-44, дар вилояти Хатлон шабона 21-26 рўзона 40-45 дараҷа гарм, дар Вилояти Мухтори Кўҳистони Бадахшон /ВМКБ/ шабона 17-22 рўзона 33-36 дарҷа гарм. Дар Дарвоз бошад ҳарорати ҳаво рўзона то 40 дараҷа гарм мешавад. Дар Шарқи ВМКБ шабона 4-9 рўзона 22-25дарҷа гарм, дар кўҳҳо рўзона то 34-36 дараҷа гарм хоҳад шуд. Дар ноҳияҳои тобеи марказ ва пойтахти ҷумҳурӣ-шаҳри Душанбе ҳарорати ҳаво шабона 22-24 ва рўзона 40-42 дараҷа гарм мешавад. Имрўз, 5 июл ҳаво дар пойтахт шабона 17-22 рўзона 34-39 дараҷа гарм мешавад.