Ҷавонони тоҷик дар Шерозу Машҳад таҳсил хоҳанд кард

Душанбе, 10 июл.(АМИТ «Ховар», Марзия Саидова).-Интизор меравад, ки 187 нафар ҷавонони довталаби тоҷик баъди супоридани имтиҳонҳо сазовори номи донишҷў гардида, таҳсилро дар донишгоҳҳои давлатии Ҷумҳурии Исломии Эрон идома диҳанд. «Алҳол ҷавонони тоҷик як имтиҳони тестиро супоридаанд ва дар санаи 15 июл имтиҳони дуюм оғоз меёбад, ки он ба таври сўҳбат ҷараён хоҳад гирифт», мегўяд Абдусаттор Одинаев — мудири бахши рушди таҳсилоти байналмилалии Вазорати маорифи ҷумҳурӣ. Мавсуф афзуд, ки дар соли равон Ҷумҳурии Исломии Эрон барои ба таҳсил фаро гирфитани ҷавонони тоҷик дар донишгоҳҳои давлатиаш 250 ҷой ихтисос додааст. Таҳсили донишҷўёни тоҷик дар ин кишвар дар доираи қарордоди байни Вазорати маорифи Ҷумҳурии Тоҷикистон ва Вазорати илм, маориф ва фановарии Ҷумҳурии Исломии Эрон, ки соли 2011 ба имзо расида буд, сурат мегирад. Дар посух ба савол, ки донишҷўёни тоҷик аз рўи кадом ихтисосҳо дар Эрон ба таҳсил фаро гирифта мешаванд, намояндаи масъули Вазорати маорифи кишвар гуфт: — Бо назардошти талаботи иқтисодиёти миллии Ҷумҳурии Тоҷикистон ба мутахассисони варзидаи соҳаҳои муосир, донишҷўёни тоҷик аз рўи ихтисосҳои техникӣ, технологияи барқӣ, муҳандисӣ, геология, биотехнология, нанотехнология, барномасозӣ, амнияти иттилоотӣ ва соири ихтисосҳои марбут ба табиию риёзӣ дар донишгоҳҳои давлатии Теҳрон, Машҳад ва Шероз таҳсил менамоянд. Тамоми хароҷоти таҳсил ба донишҷўён аз ҷониби Эрон пардохт карда мешавад. Алҳол дар муассисаҳои олии таълимии Тоҷикистон беш аз 1000 нафар шаҳрвандони Эрон аз ҳисоби маблағҳои шахсӣ дар зинаҳои гуногуни маълумоти олӣ- бакалавр, магистр ва аспирантура таҳсил менамоянд. Дар Эрон бошад 100 нафар донишҷўёни тоҷик аз ҳисоби худашон таҳсил доранд. Бояд зикр кард, ки сол аз сол талаботи кишварамон ба мутахассисони варзида меафзояд. Назар ба иттилои Фарҳод Раҳимов- муовини аввали вазири маорифи ҷумҳурӣ дар мактабҳои олии кишвар аз рўи 280 номгўи ихтисос мутахассис омода карда мешавад, ҳол он ки бозори меҳнат ба 450 номгўй ихтисос ниёз дорад. Русия, Украина, Белорус, Қазоқистон, Эрон аз кишварҳои хориҷие мебошанд, ки асосан барои таҳсили ҷавонони тоҷик дар мактабҳои олии худ ҷой ихтисос медиҳанд.