Мактаби тобистонаи «Ирам-2012» дарҳои худро боз мекунад

Душанбе, 6 июл. (АМИТ «Ховар», Музаффар Рустамов).- Аз 8 то 21 июли соли 2012 бо дастгирии молиявии Институти «Ҷамъияти Кушода» — Бунёди Мадад дар Тоҷикистон дар ҳамкорӣ бо Вазорати маорифи Тоҷикистон ва мақомоти иҷроияи ҳокимияти давлатии вилояти Суғд дар Истироҳатгоҳи солимгардонии кӯдакон, наврасон ва ҷавонон ба номи «20-солагии Истиқлолияти Тоҷикистон»-и вилояти Суғд (н. Ҷаббор Расулов) мактаби тобистонаи «Ирам-2012» ташкил мешавад.
Ҳадафи асосии ин мактаб мусоидат ба ҳамгироии иҷтимоии наврасону ҷавонони имконияташон маҳдуд, таъсиси муҳити дастрас, шароити истироҳати тобистона, омӯзиш ва иштироки фаъолона дар семинарҳои таҳсилотӣ, сабқатҳои мубоҳисавӣ, чорабиниҳои фарҳангиву варзишӣ ва таъсиси шабеҳи модели давлати демократӣ мебошад.   Мавриди ёдоварист, ки дар лагер 80 нафар наврасону ҷавонони аз 14 то 20-солаи ҳамаи манотиқи кишвар, ки аз онҳо 30 нафарашон имконияти маҳдуд доранд, иштирок мекунанд.