Ҳолати ташвишовари техникаи коммуналӣ

Душанбе, 13 август. (АМИТ «Ховар», Лаззат Диловарзод).- То имрӯз ҳолати бади таъмини техникаи махсуси корхонаҳои коммуналӣ роҳи ҳалли худро пайдо накардааст. Дар моҳи июли соли 2012 дар мувозинаи корхонаҳои коммуналии шаҳру ноҳияҳои ҷумҳурӣ аз 709 адад техникаи махсуси баҳисобгирифташуда, танҳо 256 адади он коршоям мебошад,- иброз дошт директори кулли КВД «Хоҷагии манзилию коммуналӣ» А. Тағоймуродов ба мухбири АМИТ «Ховар». Ба гуфти А.Тағоймуродов, 453 адад техникаи дар мувозинаи корхонаҳои соҳа ба қайд гирифташуда мӯҳлати дуюму сеюми истифодабариашон кайҳо гузаштааст. Бо вуҷуди он ки техника хеле кӯҳнаю фарсуда аст, баҳри самаранок истифода намудани он дар асоси фармони директори кулли Корхонаи воҳиди давлатии «Хоҷагии манзилию коммуналӣ» -и ҷумҳурӣ ҳамаи роҳбарони корхонаҳои коммуналии шаҳру ноҳияҳо вазифадор карда шуданд, ки техникаи дар ихтиёр доштаашонро аз таъмир бароварда, мӯҳлати истифодаи онҳоро зиёд намоянд.То охири моҳи июл 15 фоизи техникаи таъмирталаб ба маблағи 147 ҳазор сомонӣ аз таъмир бароварда шуд.- «Бо мақсади беҳтар намудани сифати хизматрасонии коммуналӣ дар миқёси ҷумҳурӣ 79 адад мошинҳои партовкаш, 67 адад мошинҳои махсуси ассенизатсионӣ, 54 адад экскаватор ва булдозерҳо лозиманд, ки хариди он маблағи хеле калонро талаб мекунад. Мо чунин маблағро дар суратҳисоби худ надорем ва аз ин рӯ, техникаи дар ихтиёр доштаамонро гаштаю баргашта таъмир ва мавриди истифода қарор медиҳем»,- афзуд А. Тағоймуродов.