Николае Уреке: «Рисолати аслии ман густариши ҳамкориҳои ду кишвар аст»

Душанбе, 11 август. (АМИТ «Ховар», Дилшодаи Хайруллоҳ).- Дирӯз, 10-уми август Сафири тозаинтихоби фавқулодда ва мухтори Ҷумҳурии Руминия дар Тоҷикистон Николае Уреке ба Президенти Ҷумҳурии Тоҷикистон Эмомалӣ Раҳмон эътимоднома супурд. Баъд аз супоридани эътимоднома ва мулоқот бо Президенти Тоҷикистон сафири навтаъйин бо доираи васеи хабарнигорони ватанӣ сӯҳбат намуд.   Сафири Руминия гуфт, рисолати аслии ман аз интихоб гардиданам ба ҳайси сафир, ин тақвият ва густариши муносибатҳои дуҷонибаи Тоҷикистону Руминия мебошад ва имрӯз иқтидорҳои фарохе дар ин самт маҷуданд. «Имрӯз муносибатҳои сиёсии Руминия ва Тоҷикистон дар сатҳи лозима қарор дошта, ҳамкориҳои гуногунсоҳаи ду кишвар дар ҳошияи созмонҳои байналмилалӣ аз дурнамои хуби равобити мо дарак медиҳанд.»- иброз дошт сафир.