Сафири Тоҷикистон ба Президенти Латвия эътимоднома супорид

Душанбе, 24 август. (АМИТ «Ховар», Мавҷуда Анварӣ). — 20 сентябри соли ҷорӣ Сафири Фавқулода ва Мухтори Ҷумҳурии Тоҷикистон дар Ҷумҳурии Латвия Қозидавлат Қоимдодов ба Президенти Ҷумҳурии Латвия Андрис Берзинш эътимоднома супорид. Баъди маросими супоридани эътимоднома ҷонибҳо доир ба вазъи имрӯза ва вазифаҳои минбаъда ҷиҳати густариши муносиботи дуҷониба, инчунин мавқеи Тоҷикистону Латвия оид ба масъалаҳои мубрами байналмилалӣ табодули назар намуданд. Ҷонибҳо дар бораи робитаҳои тиҷоратию иқтисодӣ сухан ронда, густариши муносибатҳоро дар соҳаи саноати кимиё, истеҳсолоти нассоҷӣ, озуқаворӣ, истифодаи роҳҳои нақлиётӣ, технологияҳои иттилоотию коммуникатсионӣ ва сохтмон самтҳои афзал ҳисобиданд ва тавсеа ва таъмиқи пояи шартномавию ҳуқуқии ду ҷонибро зарур донистанд. Зикр гардид, ки тибқи маълумоти Агентии инвеститсия ва рушди Латвия имрӯз дар Ҷумҳурии Латвия 91 корхона бо саҳми сармоягузорони тоҷик амал менамояд.Президенти Латвия изҳори итминон намуд, ки бо оғози фаъолияти сафир сатҳи муносибот боз ҳам баландтар гардида, робитаҳои дуҷонибаи Тоҷикистону Латвия густариши ҳамаҷониба хоҳанд ёфт.Инчунин зимни сафар Қ. Қоимдодов бо ҳамватанон ва донишчӯёни тоҷик, ки дар мактабҳои олии Латвия таҳсил мекунанд, вохӯрӣ намуд.Дар ин бора аз Вазорати корҳои хориҷии кишвар ба АМИТ «Ховар» хабар доданд.