Таҷлили ҷашни Истиқлол аз ҷониби саноатчиён

Душанбе, 7 сентябр. (АМИТ «Ховар», Дилшодаи Хайруллоҳ). — Имрӯз дар Вазорати энергетика ва саноати Ҷумҳурии Тоҷикистон ба муносибати 21-умин солгарди Истиқлолияти Ҷумҳурии Тоҷикистон ҷамъомади тантанавӣ баргузор гардид. Ҷамъомадро муовини вазири энергетика ва саноат Хайрулло Маҳмадуллоев ифтитоҳ намуда, оид ба моҳият ва аҳамияти истиқлолият, дастовардҳо, пешрафти ҷумҳурӣ дар марҳилаҳои соҳибистиқлолӣ, ҷойгоҳи давлати тоҷикон дар арсаи байналмилалӣ ибрози назар намуд. Зикр шуд, ки дар замони истиқлоли ҷумҳурӣ, бунёди иншооти дорои аҳамияти стратегӣ ва дигар иншоот, аз ҷумла дар соҳаҳои энергетика ва саноат аз дастовардҳои қобили таваҷҷӯҳ ба ҳисоб мераванд. Дар ҷамъомад кормандону мутахассисони дастгоҳи вазорат сухан гуфта, баланд бардоштани ҳисси ватандӯстиро дар марҳилаҳои кунунӣ ва минбаъда дар робита ба рушди соҳаҳои гуногуни ҷумҳурӣ аз вазифаҳои муқаддаси ҳар фарди ҷомеа арзёбӣ намуданд. Дар хотима ба муносибати ҷашн шуморе аз кормандон бо ифтихорномаи вазорат мукофонида шуданд. Дар ин бора ба мухбири АМИТ «Ховар» аз котиботи Вазорати энергетика ва саноати ҶТ иттилоъ доданд.