«Ҳамарўза 300 тонна орд» — дастури шаҳрдорӣ

Душанбе, 1 октябр.(АМИТ “Ховар”, Марзия Саидова).-Бо дастури шаҳрдорӣ барои Агентии захираҳои моддӣ ва соҳибкорони ба воридоту фурўши яхлухти орд машғулбуда, дар таносуби чор ноҳияи пойтахт 28 ҷойи савдои орд ташкил шуда ва шурўъ аз 1 октябри соли равон на кам аз 300 тонна орд ҳамарўза бо нархи 150 сомонӣ барои як халта ба фурўш бароварда мешавад. Дар ҷаласае, ки бо иштироки соҳибкорону тоҷирони масъул ба воридоту фурўши яхлухт ва чаканаи ғаллаву орд директорони бозорҳо ва роҳбарони сохторҳои марбутаи шаҳрӣ, ки таҳти раёсати Маҳмадсаид Убайдуллоев, раиси шаҳри Душанбе доир шуд, масъалаи бо орд таъмин кардани бозорҳои пойтахт матраҳ гардид. Раиси шаҳр таваҷҷуҳи иштирокдоронро ба ғанӣ гардонидани бозори истеъмолӣ, роҳ надодан ба таври стихиявӣ ва бе асосҳои иқтисодию сўйистифода аз қобилияти харидории сокинони шаҳр боло бурдани нархи дилхоҳ маҳсулот нигаронид. Мавсуф барои дастгирии истеъмолкунандагони пойтахт соҳибкоронро ба адлу инсоф даъват намуда, баҳри пешгирии болоравии нархи орд дар бозорҳои шаҳр КВД “Оид ба истеҳсол, харид, захира ва фурўши маҳсулоти ниёзи аввалия дар шаҳри Душанбе“ ва директорони бозорҳои пойтахтро муваззаф сохт, ки интиқолу фурўши ордро дар бозорҳо таъмин созанд.