Кӯмаки «Тоҷиксодиротбонк» ба аҳолии Шуғнон

Душанбе, 8 октябрь. (АМИТ «Ховар», Покиза Маҳмадбекова). — Дар арафаи Рӯзи забони давлатӣ ҶСК “Тоҷиксодиротбонк” ба 1300 оилаи ниёзманди ноҳияи Шуғнони Вилояти Мухтори Кӯҳистони Бадахшон кӯмаки моддӣ расонид.  Ба мухбири АМИТ «Ховар» аз ҶСК «Тоҷиксодиротбонк» иттилоъ доданд, ки ба ҳар хонавода 50 кг орд, 20 кг биринҷ, 15 кг шакар, 10 кг равғани растанӣ, 10 кг марҷумак ва 10 кг ҷавдор тақдим шуд. Ҷиҳати расонидани ин кӯмак роҳбарияти бонк ба ноҳияи Шуғнон сафар намуда, бо мардуми ноҳия аз наздик вохӯрию сӯҳбатҳо анҷом дод. Тавре раиси ҶСК “Тоҷиксодиротбонк” Тоҷиддин Пиров дар ҳузури ҷамъомадагон дар маркази ҷамоатҳои ноҳия таъкид намуд, иҷрои ин амали хайр, ки аз таваҷҷӯҳи беандозаи Сарвари Давлат нисбат ба Бадахшон ва мардуми он гувоҳӣ медиҳад, барои мо ва кормандони бонк боиси ифтихор аст. Сокинони ноҳияи Шуғнон самимона аз ин иқдоми наҷиби Президенти ҷумҳурӣ изҳори сипос намуданд. Бояд гуфт, ки худи ҳамон руз дар чойхонаи миллии шаҳри Хоруғ хатнасури 150 нафар фарзандони оилаҳои ниёзманди ноҳияи Шуғнони ВМКБ аз ҷониби ҶСК “Тоҷиксодиротбонк” доир гардид. Чорабинии мазкур дар доираи дастуру супоришҳои Президенти мамлакат Эмомалӣ Раҳмон, ки зимни сафари корӣ ба Вилояти Мухтори Кӯҳистони Бадахшон ба роҳбарияти Бонк дода буд, амалӣ гардид.