Парлумон лоиҳаи қонуни ҳифзи ҳавои атмосфераро матраҳ кард

Душанбе, 8 октябр.(АМИТ «Ховар», Марзия Саидова).-Лоиҳаи Қонуни Ҷумҳурии Тоҷикистон «Дар бораи ҳифзи ҳавои атмосфера» бо мақсади такмили қонунгузории кишвар дар соҳаи ҳифзи муҳити зист таҳия шудааст, гуфт 8 октябр зимни баррасии лоиҳаи қонуни мазкур Саиди Ёқубзод- раиси Кумитаи Маҷлиси намояндагон дар ҷаласаи Шўрои палатаи поёнии парлумони мамлакат, ки таҳти раёсати Шукурҷон Зуҳуров- раиси Маҷлиси намояндагон доир гардид. Зикр гардид, ки лоиҳаи Қонуни Ҷумҳурии Тоҷикистон «Дар бораи ҳифзи ҳавои атмосфера» асосҳои ҳуқуқӣ, иқтисодӣ, иҷтимоии таъмини ҳифзи ҳавои атмосфераро дар Ҷумҳурии Тоҷикистон муайян ва муносибатҳои мақомоти давлатӣ, шахсони мансабдор, шаҳрвандон, ташкилоту иттиҳодияҳои ҷамъиятӣ ва корхонаву муассисаҳоро вобаста ба таъмини амнияти экологӣ танзим менамояд.Аъзои Шўро ҳамзамон лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи хизмати давлатӣ», Дар бораи Созишномаи қарзии имтиёзнок байни Ҳукумати Ҷумҳурии Тоҷикистон ва Бонки содироту воридоти Ҷумҳурии Мардумии Чин оид ба таҷдиди қисмати сеюми марҳилаи аввали роҳи автомобилгарди Душанбе-Қулма, қитъаи Душанбе-Данғара, «Дар бораи Протоколи молиявӣ байни Ҳукумати Ҷумҳурии Тоҷикистон ва Ҳукумати Ҷумҳурии Фаронса оид ба «Лоиҳаи сохтмони терминали нави «Фурудгоҳи байналмилалии Душанбе» аз 1 майи соли 2009» ва «Созишномаи иловагӣ ба Протоколи молиявӣ аз 1 майи соли 2009 байни Ҳукумати Ҷумҳурии Тоҷикистон ва Ҳукумати Ҷумҳурии Фаронса»-ро, ки 29 июни соли 2012 ба имзо расидааст, баррасӣ намуданд.