Ронандаи 13- сола зани 72- соларо ба ҳалокат расонд.

Душанбе, 30 октябр. (АМИТ «Ховар», Музаффар Рустамов). –26 октябри соли равон соати 17.30 ронандаи мошини тамғаи «Мерседес-Бенс», таҳти идораи ноболиғ Муҳаммадалӣ Раҳимови 13- сола, бе шаҳодатномаи ронандагӣ, ҳангоми ҳаракат дар кӯчаи Ҷаббор Расулов пиёдагард Сифаторо Хосабековаи 72- соларо зер мекунад, ки дар натиҷа пиёдагард ҷароҳати ҷисмонӣ бардошта, дар ҷои ҳодиса ба ҳалокат мерасад. Худи ҳамон рӯз соати 08.30 дар ноҳияи Данғара ронандаи мошини тамғаи «Опел-Вектра» Музаффар Сафарови 43- сола ҳангоми ҳаракат аз самти шаҳри Душанбе ба самти ноҳияи Данғара дар километри 62-юми роҳ беҳатарии ҳаракати роҳро таъмин карда натавониста, мошинро ба чуқурии 122 метр чаппа мекунад, ки дар натиҷа худи ронанда ва ду нафар мусофири ӯ бо ҷароҳатҳои ҷисмонӣ ба беморхона равон карда мешаванд, ки дар он ҷо як нафар мусофир ба ҳалокат мерасад.Ҳамчунин 21 октябри соли равон соати 09.00 дар ноҳияи Файзобод ронандаи мошини тамғаи «Опел-Астра» Каримзода Муҳаммади 21- сола ҳангоми ҳаракат дар роҳи мошингарди Ваҳдат-Рашт-Ҷиргатол бехатарии ҳаракати роҳро таъмин карда натавониста, ба самти муқобили ҳаракати роҳ баромада, ба мошини тамғаи «Мерседес-Бенс», ронандааш Раҳматулло Сангови 24- сола бармехӯрад, ки дар натиҷа худи ронандаи мошини тамғаи «Опел-Астра» дар ҷои ҳодиса ба ҳалокат мерасад ва мусофири дохили мошини тамғаи «Мерседес-Бенс» Меҳриддин Каримови 20- сола ҷароҳати ҷисмонӣ бардошта, дар беморхона бистарӣ мегардад. Дар ин бора аз шуъбаи ташвиқоту тарғиботи Раёсати Бозрасии Давлатии автомобилии Вазорати корҳои дохилии ҶТ Маҳмадшариф Шамсов иттилоъ дод.