Қонуне, ки савдоро ба танзим медарорад

Душанбе, 26 ноябр.(АМИТ «Ховар», Марзия Саидова).-Дар ояндаи наздик палатаи поёнии парлумони Тоҷикистон лоиҳаи Қонуни нав- Қонуни Ҷумҳурии Тоҷикистон «Дар бораи савдо ва хизматрасонии маишӣ»-ро баррасӣ ва қабул хоҳад кард. Масъалаи мазкур 26 ноябр дар ҷаласаи Шўрои палатаи поёнии парлумони Тоҷикистон, ки таҳти раёсати Шукурҷон Зуҳуров-раиси Маҷлиси намояндагон баргузор гардид, муҳокима шуд. Сафаралӣ Раҷабов- раиси Кумитаи палатаи поёнии парлумони мамлакат оид ба иқтисод ва молия дар назди аъзои Шўро гуфт, ки: «Лоиҳаи қонуни мазкур бо мақсади асоснок ва объективона истифода бурдани тадбирҳои танзими давлатии савдои чакана, хўроки умумӣ ва хизматрасонии маишӣ ба аҳолӣ, бартараф намудани дахолати беасоси мақомоти давлатӣ ба танзими савдои чакана, ҳимояи бозори молу хизматрасониҳои таъиноти истеъмолӣ, ҳуқуқ ва манфиатҳои қонунии шахсони воқеӣ ва ҳуқуқӣ, таъмини интиқоли озоди молҳо ва хизматрасониҳои таъиноташон истеъмолӣ дар қаламрави Ҷумҳурии Тоҷикистон таҳия шудааст». Зикр гардид, ки лоиҳаи қонуни мазкур аз 7 боб ва 25 модда иборат буда, бобҳои алоҳида ба назорати давлатӣ ва санҷиш дар соҳаи савдои чакана, хўроки умумӣ ва хизматрасонии маишӣ ба аҳолӣ, пешбурди баҳисобгирӣ ва ҳисоботдиҳӣ, гузаронидани санҷишҳо, масъалаҳои коргузорӣ, таъминоти кадрӣ, талаботи умумӣ ба кормандон, таълими тахассусии онҳо, омодагии касбӣ ва ҳамчунин гузаронидани муоинаи тиббӣ бахшида шудаанд.