Ҷинояткорӣ боиси ташвиш шудааст

Душанбе, 2 ноябр. (АМИТ «Ховар», Лаззат Диловарзод).- Тибқи маълумоти ба Агентии омори назди Президенти ҷумҳурӣ пешниҳод намудаи Вазорати корҳои дохилӣ, Прокуратураи генералӣ, Агентии назорати маводи нашъаовари назди Президенти ҷумҳурӣ, Прокуратураи ҳарбӣ, Хадамоти гумруки назди Ҳукумати ҷумҳурӣ, Агентии назорати давлатии молиявӣ ва мубориза бо коррупсия ва Кумитаи давлатии амнияти миллӣ, дар давоми моҳҳои январ-сентябри соли 2012 шумораи ҷиноят дар ноҳияҳои тобеи ҷумҳурӣ ба 10,7 фоиз, шаҳри Душанбе-5,7, вилояти Хатлон-5,1, Раёсати корҳои дохилӣ дар нақлиёт (РКДН) ба андозаи 8,2 фоиз нисбат ба ҳамин давраи соли 2011 зиёд шудааст, ки боиси нигаронӣ мебошад. Дар вилояти Суғд ва ВМКБ баръакси дигар минтақаҳо ҷинояткорӣ мутаносибан 16,8 ва 0,3 фоиз кам шудааст.Ба иттилои манбаъ, ҷинояткорӣ дар вилояти Хатлон аз 2891 адад (дар 9 моҳи соли 2011) ба 3039 адад (дар 9 моҳи соли 2012), дар шаҳри Душанбе аз 3641 ба 3849, дар РКДН аз 385 ба 402 адад расидааст. Бахусус афзоиши ҷиноят дар РКДН нафақат кормандони ин соҳаро ба ташвиш овардааст, балки боиси нигаронии ҷиддии роҳбарияти Вазорати корҳои дохилӣ низ гардидааст.