Баҳси мушкилоти ғайриқонунии прекурсорҳо дар Бишкек

Душанбе, 5 ноябр. (АМИТ «Ховар», Ибодат Давлатова). — Имрӯз дар шаҳри Бишкек, пойтахти Қирғизистон мулоқоти дурӯзаи Гурӯҳи кории минтақавии маълумотӣ оид ба прекурсорҳо ба кор оғоз кард, ки дар он ду намоянда аз Агентии назорати маводи нашъаовари назди Президенти Ҷумҳурии Тоҷикистон ширкат мекунанд. Тавре ки аз маркази матбуоти Агентии назорати маводи нашъаовари назди Президенти ҶТ иттилоъ доданд, иштирокдорони мулоқоти корӣ масъалаҳои муомилоти ғайриқонунии прекурсорҳо ва табодули захираҳои маълумотӣ дар ин самтро мавриди баҳсу баррасӣ қарор медиҳанд. Нишасти мазкур дар доираи иҷрои қарори Гурӯҳи кории минтақавӣ оид ба прекурсорҳо ташкил шудааст, ки 1-2 майи соли 2012 дар шаҳри Тошканд баргузор шуда буд ва он дар чаҳорчӯби «Барномаи минтақавии Раёсати СММ оид ба маводи мухаддир ва пешгирии ҷинояткорӣ барои Афғонистон ва кишварҳои ҳамсояи он» мегузарад. Дар мулоқот ҳамчунин кормандони мақомоти ҳифзи ҳуқуқи Афғонистон, Покистон, Тоҷикистон, Туркманистон ва Ӯзбекистон ширкат мекунанд, қайд намуд манбаъ.