Медали ВКД ФР ба корманди РМҶМ ВКД ҶТ

Душанбе, 15 ноябр. (АМИТ «Ховар», Лутфия Эшонқулова).- Имрӯз, 15 ноябр бахшида ба рӯзи таъсиси Раёсати мубориза бар зидди ҷиноятҳои муташаккили ВКД дар раёсати мазкур чорабинии идона баргузор гардид. Дар чорабинӣ директори Институти фалсафа ва ҳуқуқи Академияи илмҳои ҷумҳурӣ, доктори илми фалсафа, профессор Абдулвоҳид Шамолов иштирок ва суханронӣ карда, аз нақш ва саҳми кормандони Раёсати мубориза бар зидди ҷиноятҳои муташаккил дар давлатдории навин ёдовар гардида, иброз намуд, ки кормандони милитсия ҳамеша дар мубориза бар зидди ҷинояткорӣ дар сафи пеш қарор дошта, он амалу кирдорҳое, ки бар зидди обрӯ ва ҳуқуқи инсон нигаронида шудаанд, аз тарафи кормандони раёсати номбурда пешгирию барҳам дода мешаванд. Мавсуф аз таърих ва моҳияти Иҷлосияи 16-уми Шӯрои олӣ ёдовар шуда, ба ҳозирин таъкид дошт, ки бо дарки масъулият ва садоқати худ ба қадри ин дастоварди беназири сиёсӣ бирасанд. Тавре ки сомонаи расмии ВКД хабар медиҳад, бо фармони вазири корҳои дохилӣ ба як қатор кормандони фаъол медалу ифтихорнома ва сипоснома супорида шуд. Инчунин барои ҳамкории фаъол бо фармони вазири корҳои дохилии Федератсияи Русия Владимир Колоколтсев ба як нафар корманди раёсати мазкур полковники милитсия Маҳбуба Қосимова медал тақдим гардид. Бо фармони сардори Раёсати мубориза бар зидди ҷиноятҳои муташаккил 14-нафар занон, ки дар қатори мардон фаъолияти низомӣ доранд, бо мукофоти пулӣ қадрдонӣ шуданд.