Вохӯрии Хадамоти муҳоҷират бо раисони ҷамоати ноҳияи Рӯдакӣ

Душанбе, 5 ноябр. (АМИТ «Ховар», Ибодат Давлатова).-Рӯзи 7 ноябри соли ҷорӣ бо мақсади гузаронидани корҳои фаҳмондадиҳию иттилоотӣ вохӯрии роҳбарияти Хадамоти муҳоҷирати назди Ҳукумати Ҷумҳурии Тоҷикистон бо раисони ҷамоатҳо, мактабҳо, ташкилотҳои ҷамъиятӣ, инчунин бо шахсони масъул ва фаъолони ноҳияи Рудакӣ дар назар аст.Тавре ки ба мухбири АМИТ «Ховар» аз маркази матбуотии Хадамоти муҳоҷират иттилоъ доданд, дар мулоқот қарор аст, масъалаҳои шиносоӣ бо вазъи муҳоҷирони меҳнатии шаҳрвандони ҶТ дар хориҷи кишвар, пешгирии муҳоҷирати ғайриқонунӣ, баҳисобгирии муҳоҷирон-шаҳрвандони ҶТ, ҳамкорӣ бо ҷамъиятҳо ва саҳми онҳо дар рушди ноҳия, иҷозатномадиҳӣ дар соҳаи муҳоҷирати меҳнатӣ, бақайдгирӣ ва назорати фаъолияти муҳоҷирони меҳнатии хориҷӣ дар Ҷумҳурии Тоҷикистон, дараҷаи забондонии муҳоҷирони меҳнатӣ, касбомӯзӣ, одобу русум, таърих ва фарҳанги кишварҳои қабулкунанда ва дигар масъалаҳое, ки ба мавзӯи муҳоҷирати меҳнатӣ марбутанд, мавриди муҳокима ва гуфтугӯ қарор хоҳанд гирифт.