Қарзи бебозгашти Ҷопон

Душанбе, 14 декабр. (АМИТ «Ховар», Пайрав Назаров). – 13 декабр дар Сафорати Ҷопон дар Тоҷикистон маросими ба имзо расонидани қарордодҳои бебозгашт ба маблағи беш аз 560 ҳазор доллари ИМА баргузор гардид. Қарордодҳоро аз рӯи панҷ лоиҳаи мухталиф барои дастгирии бахшҳои маорифи ноҳияҳои Спитамен ва Шӯрообод, ҳамчунин рушди соҳаи тандурустии ноҳияҳои Шаҳринав, Мурғоб ва Ишкошим Сафири Ҷопон дар Тоҷикистон Хироюки Имахаши ва раисони ноҳияҳои номбурда имзо намуданд.Аз ҷумла, лоиҳаҳои таҷдиди мактаби миёнаи рақами 28 ҷамоати Нови ноҳияи Спитамен дар ҳаҷми 113 ҳазору 439 доллар, сохтмони бинои нави мактаби миёнаи рақами 4 деҳаи Доғистони ҷамоати Доғистони ноҳияи Шӯрообод дар ҳаҷми 111 ҳазору 889 доллар, такмили шӯъбаи ҷарроҳии беморхонаи марказии ноҳияи Шаҳринав дар ҳаҷми 107 ҳазору 017 доллар, беҳдошти беморхонаи маркази ноҳияи Ишкошим дар ҳаҷми 108 ҳазору 655 доллар, беморхонаи маҳаллии ҷамоати Қарокӯли ноҳияи Мурғоб дар ҳаҷми 120 ҳазору 373 доллар имзо гардиданд.