Ҳадафҳои стратегии миллии кишвар амалӣ хоҳанд шуд

Душанбе, 25 декабр.(АМИТ «Ховар», Марзия Саидова).- Лоиҳаи «Стратегияи баланд бардоштани сатҳи некўаҳволии мардуми Тоҷикистон барои солҳои 2013-2015» дар ҷаласаи Шўрои палатаи поёнии парлумони Тоҷикистон матраҳ гардид. Стратегияи мазкур тибқи моддаи 7 –и Қонуни Ҷумҳурии Тоҷикистон «Дар бораи дурнамоҳои давлатӣ, консепсияҳо, стратегияҳо ва барномаҳои инкишофи иҷтимоию иқтисодии Ҷумҳурии Тоҷикистон» аз сӯи ҳукумати мамлакат таҳия ва ба парлумони кишвар ироа гардидааст. Ҳадафи ин санад татбиқи «Стратегияи миллии рушди Ҷумҳурии Тоҷикистон барои давраи то соли 2015» аз тарафи Ҳукумати Ҷумҳурии Тоҷикистон мебошад.
Сафаралӣ Раҷабов — раиси кумитаи иқтисод ва молияи Маҷлиси намояндагон зимни тавзеҳи масъалаи мазкур гуфт, ки он дар асоси Паёми Президенти кишвар ба Маҷлиси Олӣ бо мақсади амалӣ намудани ҳадафҳои стратегии миллии кишвар, барои таъмини истиқлолияти энергетикиву амнияти озуқаворӣ ва раҳоӣ аз бунбасти коммуникатсионӣ, рушди иқтисоди миллӣ таҳия гардида, яке аз самтҳои асосии фаъолияти сохтору мақомоти давлатӣ маҳсуб мешавад.