Ҳавои сарди сибирӣ барф меорад

Душанбе, 25 декабр.(АМИТ «Ховар», Марзия Саидова).- 27 декабр ба ҷумҳурӣ таъсири ҳавои сарди сибирӣ расида, ҳарорати ҳаво аз 10 то 12 дараҷа паст мефарояд. Назар ба иттилои Парвина Саидҷамолова-мудири шуъбаи пешгўии боду ҳавои Муассисаи давлатии ҳавошиносии кишвар 27 декабр то нимаи 28 декабр дар саросари кишвар барфи сахт меборад. Ҳаво дар ин рўзҳо дар вилояти Суғд шабона ва рўзона 5-10 дараҷа сард, вилояти Хатлон шабона 3 -8 дараҷа сард, рўзона аз 4 дараҷа сард то 1 дараҷа гарм, ноҳияҳои тобеи марказ шабона 3-8 дараҷа, рўзона 0-5 дараҷа сард, дар ғарби Вилояти Мухтори Куҳистони Бадахшон шабона 5-10, рўзона 1-6 дараҷа сард, дар шарқи вилоят шабона 20-25, рўзона 5 -10 дараҷа сард мегардад. Ҳавои пойтахти ҷумҳурӣ рўзҳои 27-28 декабр шабона 6-8 дараҷа, рўзона 3-5 дараҷа сард мешавад.  Аз 29 декабр то 3 январи соли 2013 ҳаво дар ҷумҳурӣ бебориш боқӣ мемонад. Аз ин рў, сокинони ҷумҳурӣ Соли нави мелодии 2013 –ро бе барф истиқбол хоҳанд гирифт, мегўяд мутахассиси бахши ҳавошиносии кишвар Парвина Саидҷамолова. Имшаб ҳавои пойтахти ҷумҳурӣ-шаҳри Душанбе 3-5 дараҷа гарм хоҳад шуд.