Ҷамъбасти натиҷаи татбиқи барномаи ҷилавгирии нашъамандӣ

Душанбе, 19 декабр. (АМИТ «Ховар», Лутфия Эшонқулова). – Дар шаҳри Хуҷанд ҷаласаи Шӯрои ҳамгироии вилоятӣ ҷиҳати ҷилавгирии сӯистемоли маводи нашъаовар бахшида ба ҷамъбасти натиҷаи татбиқи Барномаи ягонагии давлатӣ баргузор гардид. Дар кори ҷаласа муовини директори Агентии назорати маводи нашъаовар Бунафша Одинаева, аъзои Шӯрои ҳамгироии вилоятӣ ҷиҳати ҷилавгирии сӯистемоли маводи нашъаовар, раисони шӯроҳои ҳамгироии шаҳру ноҳияҳои вилоят ва роҳбарони мақомоти ҳифзи ҳуқуқ ва сохторҳои қудратии вилояти Суғд ширкат доштанд.Бунафша Одинаева аҳамияти натиҷаи татбиқи барномаи мазкурро баён карда, қайд намуд, ки дар ҳошияи тарҳрезии барномаҳои минбаъдаи давлатӣ лоиҳаи стратегияи Ҷумҳурии Тоҷикистон дар бахши мубориза бо гардиши ғайриқонунии маводи нашъаовар ва ҷилавгирии нашъамандӣ барои солҳои 2013 – 2020 пешниҳод шудааст.Дар давраи татбиқи барномаи мазкур беш аз 3 ҳазору 485 килограмм маводи нашъаовар мусодира гардида, 1 ҳазору 55 нафар барои гардиши ғайриқонунии маводи нашъаовар дастгир шуданд.