Банкоматҳо бояд ҳамеша фаъол бошанд

Душанбе, 11 декабря. (НИАТ «Ховар», Покиза Маҳмадбекова). – Дар Бонки миллии Тоҷикистон бо иштироки роҳбарияти ташкилотҳои қарзии мамлакат машварат баргузор гардид. Дар он вазъи феълии фаъолияти банкоматҳо дар шаҳру ноҳияҳои кишвар, макони ҷойгиршавӣ ва бо пули нақд таъмин кардани онҳо, мушкилоти мавҷуда дар ин бахши хизматрасонии бонкӣ ва паҳлуҳои дигари масъалаи мазкур мавриди баррасии ҳамаҷониба қарор гирифтанд.  Аз хадамоти матбуоти БМТ ба мухбири АМИТ «Ховар» иттилоъ доданд, ки дар ҷараёни ҷаласа роҳбарону мутахассисони бонкҳои ҷумҳурӣ фикру андешаҳои мушаххаси худро дар мавриди ҳаллу фасли камбудиҳои мавҷуда дар кори банкоматҳо, таъмини пурра ва саривақтии онҳо бо пули нақд, ислоҳи камбудиҳои техникӣ, ки ба фаъолияти муназзами банкоматҳо монеаҳо эҷод месозанд, баён намуданд. Қайд гардид, ки банкоматҳо бояд ҳамеша фаъол бошанд, то ки соҳибони қартаҳои пардохтӣ тавонанд дар лаҳзаҳои зарурӣ аз хизматрасонии онҳо истифода баранд.