Фарҳанги замони навро омода месозем

Душанбе, 26 декабр. (АМИТ «Ховар»,Фарзона Достонзода). – Дар Донишкадаи давлатии санъати Тоҷикистон ба номи М. Турсунзода 26 декабри соли равон ҷаласаи ҳисоботии донишкада ва барномаи консерти ҳисоботии он дар соли 2012 бо иштироки устодону донишҷӯён баргузор гардид. Дар чорабинӣ ректори ДДСТ Аслиддин Низомов оид ба фаъолияти таълимӣ,илмию методӣ, эҷодӣ, тарбиявӣ ва молиявии донишкада дар давоми соли 2012 сухан ронда, қайд намуд,ки тибқи талабот ба роҳ мондани ташкил ва баргузории консертҳои академӣ ба баланд бардоштани сифати таълим ва маҳорати иҷрокунандаҳо таъсири мусбат мерасонад. Ҳадаф аз баргузории ин чорабиниҳо низ баланд бардоштани таълиму фарҳанги насли наврас ва ба замони муосир мутобиқ намудани шавқу завқи он мебошад. Ба ин восита метавон фарҳанги замони навро дар мафкураи ҷавонон ҷой дод.