Роҳандозии лоиҳаи нави Иттиҳоди Аврупо

Душанбе, 21 декабр. (АМИТ «Ховар», Пайрав Назаров). – Иттиҳоди Аврупо лоиҳаи нави «Мусоидати техникӣ барои густариши низоми иттилоотии тандурустӣ» дар Тоҷикистонро маблағгузорӣ мекунад.Тавре ки аз намояндагии Иттиҳоди Аврупо дар Тоҷикистон хабар доданд, лоиҳаи мазкур ба маблағи 3 миллиону 400 ҳазор евро бо роҳбарии ширкати EPOS Management (ЭПОС менеҷмент) – и Олмон дар амал татбиқ мешавад. Мубодилаи ахбор дар бораи вазъи саломатии аҳолӣ ва хидматрасонии тиббӣ дар кишвар ба роҳбарони баландпояи низоми тандурустӣ имкон медиҳад, ки барои беҳдошти тансиҳатии аҳолӣ чораҳои судманд бинанд.Агентии омори назди Президенти Ҷумҳурии Тоҷикистон, ки масъулияти ҷамъоварию ҳифзи омори расмии ҳукуматиро ба ӯҳда дорад, яке аз гурӯҳҳои мақсадноки лоиҳа ба шумор меравад.